1.
hayaan mong hagkan kita ngayong gabi.
muli nating tikman ang bawat paglalapat
ng ating hininga
habang ang ating mga mata
ay abala sa pagyakap sa isa't- isa.
ang bawat indayog ng ating bawat anasan
ay luwalhating dadaloy sa bawat pag-iisa
ng ating mga kaba.
2.
mahal ko,
angkinin natin ang gabing ito,
dahil bukas,
bukas ay ngingiting may luha ang araw
kasabay ang pangakong
ang nakaraang gabi ay ang huling pinakamatamis
para sa ating dalawa
3.
dahil gaya ng dapat
ay babalik ka na sa kanya
at ako
sa aking muling pag-iisa.
